शिक्षासेवी एवं साहित्यकार क्षेत्रबहादुर कुँवरको ‘जीवन कथा’ लोकार्पण

पोखरा । पोखराका शिक्षासेवी एवं साहित्यकार क्षेत्रबहादुर कुँवरको ‘जीवन कथा’ पुस्तक लोकार्पण गरिएको छ । पोखरा–१४, मझेरीपाटन निवासी कुँवरको ७५ औं जन्मोत्सव अवसरमा उनको स्वर्गवारी निवासमा आयोजित समारोहमा पुस्तक लोकार्पण गरिएको हो ।प्रमुख अतिथि पोखरा स्वास्थ्य विज्ञान प्रतिष्ठानका उपकुलपति प्राडा बुद्धिबहादुर थापाले पुस्तक विमोचन गर्दै पुस्तकले उनलाई अझ नजिकबाट चिन्ने अवसर मिल्ने बताए ।

वरिष्ठ फिजिसियन समेत रहेका प्राडा थापाले कुँवरको नियमित स्वास्थ्य जाँच गरेको स्मरण गर्दै साहित्यिक कर्ममा लाग्ने उत्प्रेरणा मिलोस् भनी दीर्घायुको कामना गरे ।पोखराको शिक्षा, साहित्य, पत्रकारिता, राजनीतिक तथा समाजसेवामा योगदान पु¥याएका कुँवरका यसअघि ७ पुस्तक पाठकसमक्ष आएका छन् ।

यसअघि उनको जीवनीसंग्रह प्रकाशित भैसकेकोमा ‘जीवन कथा’ भने आत्मवृतान्तमा आधारित छ । स्रष्टा कुँवरले ७५ वर्षको उमेरकालसम्म भोगेका विभिन्न घटनाक्रम, विगतको वस्तुस्थिति लगायतबारे झण्डै सय शीर्षकमा मिहिन ढंगले समेटेका छन् । पुस्तकबाट विगतको पोखरा चिन्ने अवसर मिल्ने भएको पुस्तक मूल्यवान् रहेको प्रकाशक पोखरा वाङ्मय प्रतिष्ठान नेपालले जनाएको छ । स्रष्टा कुँवरले लकडाउनको समय सदुपयोग आफूले सम्झे जति सम्पूर्ण विषयवस्तु यथार्थ घटनामा आधारित रहेर लेखेको हुँदा सबैको लागि उपयोगी हुने दाबी गरे ।पत्रकार विजय नेपाल, शिक्षक कमलराज ढुंगाना र अलौकिक कवि देशभक्तसिंह कुँवरले पुस्तक सम्पादन गरेको पुस्तक ३१० पृष्ठको छ ।

अलौकिक कवि देशभक्तसिंह कुँवर प्रतिष्ठानको आयोजनामा भएको कार्यक्रममा समालोचक मदन भण्डारी, निवृत्त शिक्षक समुदाय कास्कीका पूर्व अध्यक्ष तोयनाथ लामिछाने, समाजसेवी जेबी कुँवर, रोमबहादुर कार्की, पुस्तक सम्पादकहरु विजय नेपाल, कमलराज ढुंगाना, देशभक्तसिंह कुँवर लगायतले मन्तव्य व्यक्त गर्दै स्रष्टा कुँवरको दीर्घायुको कामना गरे ।

प्रतिष्ठान अध्यक्ष प्राडा यमबहादुर पौडेल क्षेत्रीको अध्यक्षतामा भएको कार्यक्रममा स्वागत सञ्चारकर्मी तिर्सना गुरुङ र सञ्चालन गीतकार सुमन श्रापितले गरेका थिए । कार्यक्रममा सञ्चारकर्मी अम्बिका राणाले स्रष्टा परिचय राखेकी थिइन् । सो अवसरमा आयोजकले पोखरा स्वास्थ्य विज्ञान प्रतिष्ठानका उपकुलपति प्राडा थापालाई स्वास्थ्य सेवामा पु¥याएको कदर गर्दै सम्मान गरेको थियो । श्रीपञ्चमीकै दिन जन्मिएका कुँवरको जन्मदिन अवसरमा सरस्वती पूजा, नारायण पूजा, लाखबत्ती गरिएको थियो । कार्यक्रमको व्यवस्थापन मेघा एफएमले गरेको थियो ।

Leave a Reply

Your email address will not be published. Required fields are marked *